NASA-მ დააანონსა, რომ მალე კოსმონავტებს ახალი თაობის სკაფანდრები ექნებათ. ამ თემასთან დაკავშირებით, პრესკონფერენცია ჩატარდება ოთხშაბათს, 1 ივნისს, თბილისის დროით 23 საათზე, ჯონსონის კოსმოსურ ცენტრში (ჰიუსტონი), სადაც გამოცხადდება, თუ რომელი კომპანია შექმნის ამ სკაფანდრებს. ეს კოსტუმები განკუთვნილი იქნება მთვარეზე Artemis-ის მისისათვის და კოსმონავტებისათვის ბევრად უფრო მოსახერხებელს გახდის მთვარის ზედაპირზე გადაადგილებას.

2022 წლის 5 მაისს, ჟურნალში Nature Materials გამოქვეყნდა კოლუმბიის უნივერსიტეტის კვლევითი ჯგუფის სტატია, სადაც ისინი იუწყებიან, რომ მათ აღმოაჩინეს ძლიერი კავშირი ელექტრონების ტრანსპორტსა და მაგნეტიზმს შორის ქრომის სულფიდის ბრომიდის ორ-განზომილებიან კრისტალებში, რომელიც შესაძლოა გამოდგეს მომავლის კვანტური კომპიუტერების ჩიპების დასამზადებლად.

2022 წლის 13 აპრილს ჟურნალმა Nature გამოაქვეყნა ამერიკელი და იაპონელი მეცნიერების ჯგუფის სტატია, სადაც ისინი იუწყებიან რომ ორ-ფენოვანი გრაფენის გამოყენებით მათ შექმნეს მინიატურული კვანტური სენსორი, რომელსაც შეუძლია ერთდროულად ამოიცნოს სინათლის ინტენსივობა, პოლარიზაცია და ტალღის სიგრძე.

სამწლიანი პაუზის შემდეგ, 2022 წლის 22 აპრილს დიდმა ადრონულმა კოლაიდერმა მუშაობა განაახლა და არის შესაძლებლობა, რომ მეცნიერება სრულიად შეცვალოს. ეს დამოკიდებულია იმაზე, მოხდება თუ არა ადრე აღმოჩენილი ანომალიის დადასტურება, რაც მიგვიყვანს მეხუთე ურთიერთქმედების აღმოჩენამდე.

2022 წლის 20 აპრილს ჟურნალმა Physical Review X გამოაქვეყნა მეცნიერთა საერთაშორისო ჯგუფის სტატია, სადაც ისინი ამტკიცებენ, რომ მათ მოახერხეს დაეფიქსირებინათ კვანტური სპინის თხევადი ძირითადი მდგომარეობა მათ მიერ შექმნილ ნაერთში Ce₂Zr₂O₇.

16 მაისს ჟურნალმა Physical Review Letters დასაბეჭდად მიიღო ასტრონომების საერთაშორისო ჯგუფის სტატია, რომელშიც გამოთქმულია ვარაუდი, რომ ნეიტრინული სიგნალი IC191001A (რომლის დეტექტირება მოხდა ანტარქტიდის ყინულებში განთავსებული ნეიტრინული ობსერვატორია IceCube-ს მიერ) შესაძლებელია უკავშირდებოდეს ზემასიური შავი ხვრელის მიერ ვარსკვლავის მიქცევით დაშლის მოვლენას AT2019fdr (რომელსაც ელექტრომაგნიტური გამოსხივების სხვადასხვა სპექტრში აკვირდებოდნენ).

11 მაისს ჟურნალ Science Advances-ში გამოქვეყნებულ ნაშრომში მოცემულია მარსის ზედაპირზე ჩინური მარსმავალის მიერ ნაპოვნ ჰიდრატირებულ მინერალებში არსებული ყინულის ანალიზის მონაცემები. მიღებული შედეგების თანახმად, ჩინეთის მეცნიერებათა აკადემიის მკვლევართა ჯგუფი, კოპენჰაგენის უნივერსიტეტის კოლეგებთან ერთად, ამტკიცებს, რომ მარსის ზედაპირზე წყალი თხევად მდგომარეობაში იმაზე გვიან გაქრა, ვიდრე აქამდე ეგონათ.

ჟურნალმა The Astrophysical Journal Letters 12 მაისს გამოაქვეყნა EHT კოლაბორაციის სტატია, სადაც მოყვანილია ირმის ნახტომის ცენტრში მდებარე სუპერმასიური შავი ხვრელის "ჩრდილის" და მისი აკრეციული კაშკაშა დისკოს პირველი სურათი. ეს კიდევ ერთი დიდი წარმატებაა EHT პროექტისთვის, რომელმაც 2019 წელს გამოაქვეყნა შავი ხვრელის სურათი გალაქტიკა Messier-87-ის ცენტრში.

ჟურნალმა Physical Review Letters აპრილში დასაბეჭდად მიიღო მეცნიერების საერთაშორისო ჯგუფის სტატია, სადაც მოცემულია GW200129 გრავიტაციულ ტალღურ სიგნალთან დაკავშირებული მონაცემების ანალიზი. სიმულაციების თანახმად, ეს მოვლენა წარმოადგენს დაახლოებით 40 და 23 მზის მასის მქონე შავი ხვრელების შერწყმას, რის შედეგადაც გამოსხივებულმა გრავიტაციულმა ტალღებმა დაახლოებით 1,500 კმ/წმ სიჩქარე მიანიჭეს შერწყმის შედეგად წარმოშობილ დაახლოებით 27 მზის მასის მქონე შავ ხვრელს.

ჟურნალ Nature-ს აპრილის ნომერში გამოქვეყნდა მეცნიერთა საერთაშორისო ჯგუფის სტატია, რომლებმაც Hubble-ის კოსმოსური ტელესკოპის მონაცემების დახმარებით აღმოაჩინეს სწრაფად მზრდი შავი ხვრელი, რომელიც უკვე არსებობდა დიდი აფეთქებიდან სულ რაღაც 750 მილიონ წლის შემდეგ. მეცნიერების აზრით, ეს უნიკალური ობიექტი არის დამაკავშირებელი რგოლი ახალგაზრდა გალაქტიკებისა და ყველაზე ადრეულ სუპერმასიურ შავ ხვრელებს შორის.