2022 წლის 19 მაისს ჟურნალმა Astrobiology გამოაქვეყნა გამოყენებითი მოლეკულური ევოლუციის ფონდის მეცნიერების სტატია, საედაც ისინი აცხადებენ, რომ რიბონუკლეინის მჟავა, რომელიც სავარაუდოდ პირველი გენეტიკური მასალა იყო სიცოცხლისთვის, სპონტანურად წარმოიქმნება ბაზალტის ლავას მინებში. ასეთი მინები დედამიწაზე უხვად იყო 4.35 მილიარდი წლის წინ, ამჟამად კი ასეთი ასაკის ბაზალტები მარსზეა შემორჩენილი.

2022 წლის 2 ივნისს ჟურნალმა Nature Photonics გამოაქვეყნა შანხაის და დეიტონის უნივერსიტეტების მკვლევართა ჯგუფის სტატია, სადაც მოთხრობილია, რომ სარკეების, ლინზებისა და ლაზერების გამოყენებით, მათ მოახერხეს ტოროიდული ფორმის სინათლის გრიგალების გენერირება.

19 მაისს ჟურნალ Nature-ში გამოქვეყნებულ ორ სტატიაში, მეცნიერების საერთაშორისო ჯგუფები ვარაუდობენ, რომ ჯუჯა გალაქტიკების ე. წ. „ტყვიის კლასსტერი“, შესაძლოა ერთი მძლავრი კოსმოსური კატაკლიზმის შედეგად ჩამოყალიბებულიყო. მკვლევარები აზრით, დაახლოებით 8 მილიარდი წლის წინ ორი ჯუჯა გალაქტიკა ერთმანეთს შეეჯახა, რამაც გამოიწვია გალაქტიკებში არსებული აირის დაშლა და მრავალი ახალი ჯუჯა გალაქტიკის ჩამოყალიბება, რომლებიც თითქმის არ შეიცავს ფარულ მატერიას. თუ ეს ჰიპოთეზა სწორია, ის შეიძლება დაგვეხმაროს ამოვხსნათ მცირე რაოდენობის ფარული მატერიის შემცველი გალაქტიკების არსებობის საიდუმლოება და გამოავლინოს ახალი დეტალები ფარული მატერიის ბუნების შესახებ.

2022 წლის 2 ივნისს ჟურნალმა Nature Communications გამოქვეყნა ბრიტანელი, რუსი და ფინელი მეცნიერების ჯგუფის სტატია, სადაც ნაჩვენებია, რომ შესაძლებელია დროის კრისტალების პრაქტიკულად გამოყენება კვანტურ კომპიუტერებში. ფიზიკოსებმა ორი დროის კრისტალის გაერთიანებით მიიღეს ხელოვნური კუბიტი უკუკავშირით და შეისწავლეს მისი დინამიკა. თავად კრისტალები წარმოადგენდნენ თხევად ჰელიუმ-3-ში წარმოქმნილ სპინური აღგზნებების კონდენსატებს, რომელთა მახასიათებლები იქცეოდნენ ორ-დონიანი კვანტური სისტემის მსგავსად. რეალური კუბიტისგან განსხვავებით, შექმნილი სისტემა საშუალებას გაძლევთ ერთი ექსპერიმენტით გაზომოთ მისი ყველა თვისება.

2022 წლის 17 მაისს ჟურნალში Physics of Fluids გამოქვეყნდა ფრანგი და ინდოელი მეცნიერების ჯგუფის სტატია, სადაც მოყვანილია შამპანურის ფოთლის გახსნის შედეგად გამოტყორცნილი აირების სტრუქტურის კომპიუტერული მოდელირების შედეგები.

ჟურნალმა Physical Review B, 25 მაისს გამოაქვეყნა ლანკასტერის უნივერსიტეტის ფიზიკოსთა ჯგუფის სტატია, სადაც აღწერილი სპეციალური კამერების სისტემა, რომელიც შეიძლება გამოყენებულ იქნას ზედენად ჰელიუმ-3-ში წარმოქმნილი გრიგალების ჩრდილების გადასაღებად.

ჟურნალმა Physical Review A ივნისში გამოსაქვეყნებლად მიიღო მეცნიერების საერთაშორისო ჯგუფის სტატია, სადაც მოთხრობილია, რომ მცირე ზომის მეტაზედაპირების გამოყენებით მათ შეძლეს ლაზერული სხივების მოდებად დაშლის სიზუსტის სამი რიგით გაუმჯობესება. ახალი ლაზერული რეჟიმის სენსორი შეიძლება გამოყენებული იქნება ნეიტრონული ვარსკვლავების შიდა ნაწილის გამოსაკვლევად და ფარდობითობის ზოგადი თეორიის ფუნდამენტური საზღვრების შესამოწმებლად.

ჟურნალში Physical Review Letters, 2 მაისს გამოქვეყნდა სარაგოსას უნივერსიტეტის (ესპანეთი) და გოტინგენის უნივერსიტეტის (გერმანია) მკვლევარების სტატია, სადა შემოთავაზებულია ახალი მეთოდი, რომელიც შეიძლება გამოყენებულ იქნას ე. წ. ბუნდოვანი ფარული მატერიის გალაქტიკური ჰალოების მოდელირებისათვის.

NASA-მ დააანონსა, რომ მალე კოსმონავტებს ახალი თაობის სკაფანდრები ექნებათ. ამ თემასთან დაკავშირებით, პრესკონფერენცია ჩატარდება ოთხშაბათს, 1 ივნისს, თბილისის დროით 23 საათზე, ჯონსონის კოსმოსურ ცენტრში (ჰიუსტონი), სადაც გამოცხადდება, თუ რომელი კომპანია შექმნის ამ სკაფანდრებს. ეს კოსტუმები განკუთვნილი იქნება მთვარეზე Artemis-ის მისისათვის და კოსმონავტებისათვის ბევრად უფრო მოსახერხებელს გახდის მთვარის ზედაპირზე გადაადგილებას.

2022 წლის 5 მაისს, ჟურნალში Nature Materials გამოქვეყნდა კოლუმბიის უნივერსიტეტის კვლევითი ჯგუფის სტატია, სადაც ისინი იუწყებიან, რომ მათ აღმოაჩინეს ძლიერი კავშირი ელექტრონების ტრანსპორტსა და მაგნეტიზმს შორის ქრომის სულფიდის ბრომიდის ორ-განზომილებიან კრისტალებში, რომელიც შესაძლოა გამოდგეს მომავლის კვანტური კომპიუტერების ჩიპების დასამზადებლად.