ჟურნალ The Astrophysical Journal Letters-ის 2021 წლის მარტის ნომერში დაიბეჭდა EHT და ALMA კოლაბორაციების ორი სტატია სადაც მოყვანილია მათ მიერ M87 გალაქტიკის ცენტრში მდებარე სუპერმასიურ შავ ხვრელის გამოსხივების ახალი ანალიზი. გამოქვეყნებულ სურათზე გათვალიწინებულია შავი ხვრელის გამოსხივების პოლარიზაციაც, რამაც ასტრონომებს საშუალება მისცათ ეპოვნათ მაგნიტური ველის დაძაბულობა და სტრუქტურა შავი ხვრელის გარშემო და შეეფასებინათ თუ რამდენად ძლიერი ჯეტები შეიძლება წარმოიშვას ამ რეგიონში.

ჟურნალ Physical Review Letters მარტის ნომერში დაიბეჭდა როჩესტერის, ნიუ-იორკის და ლას-ვეგასის უნივერსიტეტის მკვლევართა სტატია, სადაც ისინი გვაუწყებენ, რომ მათ მოახერხეს ოთახის ტემპერატურაზე ზეგამტარობის მისაღებად საჭირო წნევის შემცირება.

ჟურნალ Nature-ს 2021 წლის მარტის ნომერში დაიბეჭდა მასაჩუსეტსის ტექნოლოგიური ინსტიტუტის მკვლევარების სტატია რომელიც ეძღვნება ნეირონული ქსელების გამოყენებით მოძრავი ობიექტების 3D ჰოლოგრამების შექმნას.

ჟურნალ Nature Communications 2021 წლის თებერვლის ნომერში გამოქვეყნდა ოტავას უნივერსიტეტის მკვლევართა ჯგუფის სტატია, სადაც ისინი ასაბუთებენ მეტალების ნანო-სტრუქტურების გამოყენების მნიშვნელობას ფოტონიკაში.

2021 წლის 16 მარტს ჟურნალ AGU Advances-ში გამოქვეყნდა ასტრონომების საერთაშორისო ჯგუფის სტატია, რომელშიც იუპიტერის გარშემო Juno-ს (NASA) პირველი 20 შემოვლის მონაცემებზე დაყრდნობით მოცემულია იუპიტერის ე. წ. აისის გრიგალების ევოლუციის სრული სურათი. ეს უცნაური ნათება, რომელიც ჩნდება იუპიტერის ბნელ მხარეს და რამდენიმე საათი გრძელდება, დედამიწის ატმოსფეროში დაკვირვებული მაგნიტური გრიგალების ანალოგიური აღმოჩნდა.

ჟურნალ Physical Review D მარტის ნომერში გამოქვეყნდა მეცნიერების საერთაშორისო ჯგუფის ორი სტატია კოსმოსური მიკროტალღური ფონის საშუალებით გალაქტიკებში დაკარგული მასის აღმოჩენის შესახებ.

ვარსკვლავთშორისი სივრცის კვლევის ინიციატივის ფარგლებში გაერთიანებული მეცნიერების ბოლო კვლევის თანახმად, მზის სისტემაში ყოველწლიურად დაახლოებით 7 ვარსკვლავთშორისი ობიექტი შემოდის, რომელთა ორბიტების დადგენა შესაძლებელია, რაც ქმნის უახლოეს მომავალში მათი კოსმოსური ხომალდების საშუალებით შესწავლის შესაძლებლობას.

შარშან NANOGrav კოლაბორაციამ გამოაცხადა სამყაროს გრავიტაციული ტალღური ფონის დაფიქსირების შესახებ. ჟურნალის SciPost Physics, 2021 წლის თებერვლის ნომერში გამოქვეყნებულ სტატიაში მაინცის უნივერსიტეტის მეცნიერები ვარაუდობენ, რომ NANOGrav კოლაბორაციიის მონაცემები შესაძლოა მიუთითებდნენ ახალი ფიზიკის არსებობაზე ნაწილაკების სტანდარტული მოდელის მიღმა.

ჟურნალმა Monthly Notices of the Royal Astronomical Society 4 მარტს დასაბეჭდად მიიღო მეცნიერების საერთაშორისო ჯგუფის სტატია, სადაც ისინი განიხილავენ შესაძლებლობას, რომ გალაქტიკის ცენტრებში არსებული სუპერმასიური შავი ხვრელები წარმოიშვნენ ადრეულ სამყაროში აფეთქებული III თაობის მძიმე ვარსკვლავების ნარჩენებზე.

2021 წლის 12 მარტს Astrophysical Journal- ში გამოქვეყნდა ჰარვარდის სიმფსონის ასტროფიზიკის ცენტრის მკვლევარების მრავალწლიანი დაკვირვების შედეგები, რომლებიც ადასტურებენ J0437+2456 გალაქტიკის ცენტრში მდებარე ზერმასიური შავი ხვრელის მოძრაობას.