2021 წლის 13 მაისს, ჟურნალ Nature Physics-ში გამოქვეყნდა ამერიკელი მეცნიერების სამწლიანი ექსპერიმენტის მონაცემები, რომლებიც ადასტურებენ მოდელს, რომ სპინურ სითხეებში ელექტრონები „იშლებიან ორ ნაწილაკად“, რომლებსაც გარემოში ცალ-ცალკე გადააქვთ ელექტრონის მუხტი და სპინი.

სამეცნიერო სტატიების არქივში arXiv.org, 2021 წლის 27 აპრილს გამოჩნდა კალიფორნიის ტექნოლოგიური ინსტიტუტის მეცნიერთა სტატია, სადაც ისინი გამოთქვამენ ვარაუდს, რომ სატურნის ბირთვი ძირითადად ქვისა და ყინულის კომპაქტურ სტრუქტურას კი არ წარმოადგენს, არამედ შეიცავს დიდი რაოდენობით წყალბადს და ჰელიუმს და დაახლოებით 70,000 კილომეტრის ზომისაა, რაც დაახლოებით პლანეტის დიამეტრის 60 %-ს უდრის.

ჟურნალში Journal of Comparative Physiology, 2021 წლის 10 მაისს გამოქვეყნდა ალბერტ აინშტაინის აქამდე უცნობი წერილი, რომელშიც მეცნიერი განიხილავს ფუტკრებისა და ფრინველების განსაკუთრებულ უნარებს, რომელიც მათ ფრენისას ორიენტაციაში ეხმარება. წერილში აინშტაინი გამოთქვამს ვარაუდს მეცნიერებაში ახალი მიმართულების გაჩენის შესახებ, რომელიც ცხოველების სენსორიკის შესწავლაზე იქნება დამყარებული.

2021 წლის 20 აპრილს ჟურნალში Physical Review D გამოქვეყნდა ფრანგი ასტროფიზიკოსების სტატია, სადაც ისინი კოსმოსური გამა ტელესკოპის Fermi (NASA) მონაცემების საფუძველზე, აფასებენ ჩვენ გალაქტიკაში ანტიმატერიისგან შემდგარი ვარსკვლავების შესაძლო მაქსიმალურ რაოდენობას. გამოვლენილი იქნა ანტივარსკვლავების 14 კანდიდატი.

ციურიხის ფედერალური ტექნოლოგიების ინსტიტუტის მკვლევრებმა შეძლეს სპეციალურად მომზადებული გრაფინის ფირფიტაზე ლოკალურად ძაბვის მოდებით მიეღოთ არეები ზეგამტარის და იზოლატორის თვისებებით. რაც იმას ნიშნავს, რომ ერთიდაიგივე გრაფინის ზედაპირის სხვადასხვა ნაწილს შეიძლება ჰქონდეთ განსხვავებული ფიზიკური თვისებები. მათი შრომა 2021 წლის 3 მაისს გამოქვეყნდა ჟურნალში Nature Nanotechnology.

ჟურნალში Nature Photonics, 2021 წლის 10 მაისს გამოქვეყნდა ბრიუსელის პოლიტექნიკური სკოლის მკვლევარების სტატია ოპტიკურ რეზონატორში ლაზერის სხივების ჩატუმბვით ახალი ტიპის სოლიტონების გენერირების შესახებ, რაც საშუალებას იძლევა მიღებული იქნას მაღალი სიმძლავრის ულტრა-სტაბილური პულსების მესერი.

ჟურნალმა Science, 2021 წლის 22 აპრილს, ჩერნობილის კატასტროფის 35 წლისთავთან დაკავშირებით, გამოაქვეყნა ამერიკის კიბოს ნაციონალური ინსტიტუტის მედიკოსების ორი შრომა, რომლებიც აფეთქების პოტენციურ გენეტიკურ ეფექტებს ეხებოდა. ერთი კვლევა არ ადასტურებს გენეტიკური ცვლილებების მშობლებიდან შვილზე გადაცემას, თუმცა მეორე კვლევისას გამოვლინდა აფეთქების შედეგად დასხივებულთა შთამომავლებში ფარისებრი ჯირკვლის კიბოს შემთხვევების ზრდა.

ჟურნალმა Advanced Materials, 2021 წლის 5 მაისს გამოაქვეყნა გერმანელი მეცნიერების სტატია რამდენიმე ატომის სისქის ინოვაციური თვისებების მქონე ნახევარგამტარული მასალის შექმნის შესახებ, რომელიც 2D და 1D განზომილების სტრუქტურების შერწყმით იქნა მიღებული.

ჟურნალმა Light: Science & Applications, 2021 წლის 27 აპრილს გამოაქვეყნა ნოტინგჰემის უნივერსიტეტის მკვლევარების სტატია, სადაც ისინი იუწყებიან, რომ პირველად მოხერხდა ნანო-მასშტაბის ზონდის პროტოტიპის დამზადებ,  რომელიც შეიძლება განთავსდეს თმის ღერის სისქის ოპტიკური ბოჭკოს წვერზე და შეიყვანილი იქნას ადამიანის სხეულში. მოწყობილობას შეუძლია ერთდროულად მოგვცეს უჯრედის ზომის ობიექტის 3D სივრცითი გამოსახულება და ინფორმაცია მის მექანიკურ თვისებებზე. გაზომვის ახალი სისტემა შედგება ორი ულტრა სწრაფი ლაზერისგან, რომლებიც აღაგზნებენ და აფიქსირებენ ოპტიკური ბოჭკოს წვერზე მოთავსებული ნანო-გადამცემის მაღალი სიხშირის ულტრაბგერებს (ფონონებს).

ჟურნალმა Science Advances, 2021 წლის 30 აპრილს გამოაქვეყნა როჩესტერის უნივერსიტეტის (აშშ) მკვლევარების სტატია, რომელშიც ისინი გვამცნობენ მინიატურული გამოსახულების შემქმნელი მოწყობილობის შექმნის შესახებ. მოწყობილობაში გამოყენებულია ნანო-ფოტონური ოპტიკური ელემენტები, რომელებიც დამზადებულია სპეციალურ ზედაპირზე, მაღალი ენერგიის ელექტრონების ნაკადით ლითოგრაფიის საშუალებით.