ნეიტრინოები თითქმის უმასო ნაწილაკებია და ჯერ კიდევ არ ვიცით მათი მასის ზუსტი მნიშვნელობა. კარლსრუეში (გერმანია) მიმდინარე KATRIN ექსპერიმენტის უახლესი შედეგების თანახმად, ნეიტრინოს მასის მაქსიმალური მნიშვნელობა იმაზე მცირეა ვიდრე აქამდე გვეგონა. 19 აპრილს ამერიკის ფიზიკური საზოგადოების ონლაინ შეხვედრაზე გამოცხადდა, რომ ნეიტრინოების მასის ზედა ზღვარი 0.8 ელექტრონვოლტს არ აღემატება, რაც ელექტრონის მასაზე 600,000-ჯერ ნაკლებია.

KATRIN ექსპერიმენტში მიმდინარეობს წყალბადის იშვიათი იზოტოპის - ტრიტიუმის შესწავლა, რომელიც რადიოაქტიურად იშლება და გამოასხივებს ელექტრონს და ანტი-ნეიტრინოს. გამოტყორცნილი ელექტრონის ენერგიის ზუსტი გაზომვით შეგვიძლია ანტი-ნეიტრინოს მასის შეფასება. რაც უფრო მასიურია ნეიტრინო მით ნაკლები კინეტიკური ენერგია შეიძლება ჰქონდეს ელექტრონს. KATRIN ექსპერიმენტების წინანდელი შედეგებით, რომლებიც უფრო დაბალ სტატისტიკას ეყრდნობოდა, ნეიტრინოს მასის ზედა ზღვარი 1.1 ელეტქრონვოლტი გამოდიოდა, მაშინ როცა ახალი მონაცემებით ეს რიცხვი 0.8 ელექტრონვოლტს არ აღემატება. მომავალმა ექსპერიმენტებმა შესაძლოა ნეიტრინოს მაქსიმალური მასისთვის კიდევ უფრო დაბალი მნიშვნელობა მოგვცეს.

ჯერ კიდევ არ ვიცით რატომ არიან ნეიტრინოები ასეთი მსუბუქი, რადგან ამ ნაწილაკის მასის წყარო ჯერ კიდევ უცნობია. ფუნდამენტური ნაწილაკების უმეტესობა მასას ჰიგსის ველთან ურთიერთქმედებით იძენს, თუმცა ნეიტრინოს მასის წყარო შესაძლოა სხვა იყოს.

წყარო:

https://www.sciencenews.org/article/neutrino-max-possible-mass-tiny-new-estimate-particle-physics