სიახლეები
ზონდი Hayabusa2-ის მისია ასტეროიდ Ryugu-ზე წარმატებით გრძელდება. 2019 წლის 5 აპრილს პატარა ჭურვის გამოყენებით მან შექმნა ხელოვნური კრატერი ასტეროიდზე. მისიის მიზანია შეაგროვოს აფეთქებისას ამოტყორცნილი მასალა და მოახდინოს მისი დედამიწაზე ტრანსპორტირება.
იაპონური აერო-კოსმოსური სააგენტოს ზონდი Hayabusa2 (შევარდენი-2), გაშვებული იქნა 2014 წლის დეკემბერში. ჩვენგან 3,2 მილიარდი კილომეტრით დაშორებულ, დაახლოებით 1 კმ დიამეტრის ბრილიანტის ფორმის მქონე ასტეროიდს Ryugu-ს, ზონდმა 2018 წლის ივნისში მიაღწია და სექტემბერში მსოფლიოში პირველად განახორციელა დასაშვები მოდულების Rover-1A და Rover-1B ასტეროიდზე დაჯდომა. ოქტომბერში Ryugu-ზე უკვე დასმული იქნა მოდული MASCOT, რომელმაც დაახლოებით 17 საათი იმუშავა. ამ პერიოდში მან 3-ჯერ გამოიცვალა ადგილმდებარეობა და შეისწავლა ასტეროიდის გრუნტის შემადგენლობა. ამა წლის თებერვალში ასტეროიდზე დაეშვა თვით Hayabusa2 და გრუნტის ნიმუშებთან ერთად კვლავ დაბრუნდა ორბიტაზე ასტეროიდის გარშემო. 2019 წლის 5 აპრილს, 500 მ სიმაღლიდან ასტეროიდზე ჩაგდებული იქნა 4.5 კილოგრამიანი ჭურვი მცირე კრატერის შესაქმნელად.
ზონდი მოიცდის 22 აპრილამდე, სანამ აფეთქებით გამოწვეული მტვერი დაილექება და მოახდენს მორიგ დაშვებას Ryugu-ს ზედაპირზე კრატერთან ახლოს ნამსხვრევების შესაგროვებლად. შესაძლოა ზონდმა მესამე დაშვებაც განახორციელოს ნიმუშების შესაგროვებლად. თუ ყველაფერი წარმატებით ჩაივლის 2020 წლისთვის Hayabusa2 ნიმუშებთან ერთად დედამიწაზე უნდა დაბრუნდეს.
Ryugu-ს გრუნტის შესწავლა საშუალებას მოგვცემს გავერკვიოთ რისგან შედგებოდა ახლაგაზრდა მზის სისტემა. ამასთან შეიძლება დამტკიცდეს თეორია, რომ დედამიწაზე წყლის და სიცოცხლისთვის აუცილებელი ამინო-მჟავების არსებობა სწორედ ასტეროიდების და კომეტების დამსახურებაა. მეცნიერები ძირითადად დაინტერესებულები არიან აფეთქებისას ამოტყორცნილი ასტეროიდის შიდა ფენის ნიმუშებით, რომელიც ‘კოსმოსური ამინდის’ ზემოქმედებით არ იქნება სახეშეცვლილი.
წყარო:
