სიახლეებიბნელი ენერგიის არსზე ჯერ კიდევ კამათი მიმდინარეობს. ითვლება, რომ ის თანაბრადაა განაწილებული სამყაროში და სრული ენერგიის დაახლოებით 70 %-ს შეადგენს, ანტიგრავიტაციული ბუნებისაა, აქვს ძალიან დაბალი სიმკვრივე (10−29 გრ/სმ3) და არ შედის ჩვეულებრივ ნივთიერებასთან ურთიერთქმედებაში. ამიტომ ლაბორატორიულ პირობებში ძნელი იქნება მისი აღმოჩენა.
სამყაროს გაჩენისას ბნელი ენერგიის მოქმედება შეუმჩნეველი იყო. თუმცა სამყაროს გაფართებასთან ერთად ჩვეულებრივი მატერიის სიმკვრივე ეცემოდა და დიდი აფეთქებიდან დაახლოებით 5 მილიარდი წლის მერე გაფართოების მიუხედავად მუდმივი ბნელი ენერგია უკვე დომინანტური გახდა. ამ მომენტიდან გრავიტაცია, ანუ მიზიდულობა, განზიდვამ გადაძლია და სამყარომ უკვე თანაბარი გაფართოების ნაცვლად აჩქარებული გაფართოება დაიწყო.
ამ ფაქტს მოწმობენ შორეულ გალაქტიკებში ზეახალი ვარსკვლავების აფეთქებებზე დაკვირვება. Ia ტიპის ზეახალი ვარსკვლავების ევოლუცია ზუსტად არის შესწავლილი, ამიტომ წინასწარ შეიძლება განისაზღვროს თუ როგორი იქნება მოცემულ მანძილზე მათი სიკაშკაშე. დაკვირვებებმა აჩვენა, რომ შორეულ გალაქტიკებში ზეახალის აფეთქებების სიკაშკაშე შედარებით დაბალია და არ ემთხვევა გამოთვლებს, ანუ გალაქტიკები იმაზე შორს დაგვცილდნენ ვიდრე ეს ნავარაუდევი იყო.
თუ ბნელი ენერგიის გამზიდავი ძალა დროთა განმავლობაში განეიტრალდა, მაშინ გრავიტაცია დაიწყებს მატერიის უკან მიზიდვას და სამყარომ შესაძლოა ისევ ერთ წერტილში მოიყაროს თავი. ხოლო თუ სამყაროს აჩქარებული გაფართოება დღევანდელი ტემპით გაგრძელდა, რაღაც ეტაპზე გალაქტიკები ისე დაშორდებიან ერთმანეთს, რომ მათი ფარდობითი სიჩქარეები სინათლისაზე მეტი გახდება და მათი დანახვა უკვე შეუძლებელი იქნება. თუ ანტიგრავიტაციამ გადააჭარბა ყველა სხვა ურთიერთქმედების ძალასაც, მაშინ ბნელი ენერგია გააგრძელებს სამყაროს დაშლას - გახლიჩავს გალაქტიკებსა, შემდეგ კი დაძლევს ელექტრულ და ატომურ ძალებს და საბოლოოდ გაანადგურებს სამყაროს, ანუ მოხდება ე.წ. დიდი გახლეჩა.
