სიახლეები
2016 წელს ჟურნალ Phys. Rev. Appl.-ში გამოქვეყნებულ სტატიაში პრინსტონის უნივერსიტეტის ფიზიკოსებმა გამოთქვეს მოსაზრება, რომ შესაძლებელია ელექტროენერგიის მიღება დედამიწის ბრუნვის გამოყენებით. სტატია გააკრიტიკეს, რადგან არსებული თეორიების მიხედვით, შეუძლებელია დედამიწასთან ერთად მბრუნავ გამტარში ელექტროენერგიის გამომუშავება, რადგან წარმოქმნილი ძაბვა ქრება ელექტრონების გადაადგილებების გამო.
2025 წლის 19 მარტს Physical Review Research გამოქვეყნებულ ახალ სტატიაში მკვლევრები ფიქრობენ, რომ შესაძლებელია მოხერხდეს ძაბვის გაქრობის თავიდან აცილება სპეციალური ჩამჭერი ეკრანის მეშვეობით. მაგნიტურ ფარად მათ გამოიყენეს მანგანუმ-თუთიის (MnZn) ფერიტისგან დამზადებული ცილინდრი. ამ მასალას დაბალი მაგნიტური რეინოლდსის რიცხვი გააჩნია, ანუ მაგნიტური ველის ინდუქცია უმნიშვნელოა და ახასიათებს დიფუზიის მიმართულებით შემცირება. მკვლევარებმა აჩვენეს, რომ ამ სისტემაში ხდებოდა მცირე ძაბვის (18 მიკრო ვოლტი) გენერირება. თანაც ძაბვა იყო მაქსიმალური, როდესაც ცილინდრი მოთავსებული იყო დედამიწის ბრუნვის სიჩქარის და მაგნიტური ველის მართობულად; ძაბვა და დენი ქრებოდა, როდესაც ცილინდრს აბრუნებდნენ 90 გრადუსით სიჩქარის პარალელურად; ძაბვა და დენი კვლავ აღწევდა მაქსიმუმს, მაგრამ საპირისპირო ნიშანით, როდესაც მოწყობილობას კიდევ 90 გრადუსით აბრუნდებდნენ. რადგან ეს ქცევა ვერცერთ სხვა წყაროს ვერ დაუკავშირეს, მეცნიერები ამტკიცებენ, რომ გენერირებული დენი დედამიწის ბრუნვითაა გამოწვეული.
საბოლოო დასკვნისთვის კვლევის შედეგები უნდა დაადასტურონ სხვა ჯგუფებმა, ვინც მსგავს ექსპერიმენტს ჩაატარებენ სხვადასხვა პირობებში. მკვლევრები შენიშნავენ, რომ თუკი მათი მიგნებები სწორია, სრულიად შესაძლოა, რომ უფრო დიდი ზომის მოწყობილობით მოხერხდეს გამოსაყენებლად მისაღები დენის მიღება.
